L'opera

S´Istoria de unu cau marinu e de su gatu chi l´aiat imparadu a bolare càpitat in Amburgu e contat de unu cau marinu, Kengah, chi cun una truma de cumpàngios e de àteros pugiones est bolende chirru a su golfu de Biscàglia e a logos prus caentes, in cherta de recatu. Sa truma si ghetat a modde pro mandigare arrangada, ma Kengah, imbetzes de pònnere in mente a su capu-truma chi lis imponet de pesare in bolu pro s´isfrancare dae unu perìgulu, si torrat a imbèrghere in s´abba pro piscare àtera arrangada, chi l´agradaiat meda, ma nch´abbarat tenta in sa "maleditzione de sos mares", un´unda de petròliu, pèrdidu dae una petroliera durante una temporada manna. Cun sas ùrtimas fortzas, Kengah resessit a s´innetare e a cròmpere bolende a Amburgu. Cando b´arribbat, ruet a unu curridore de una domo in ue istat Zorba, unu gatu mannu pilinieddu, cun una mantza bianca in sa gula. In antis de morrère, su cau marinu resessit a li dare su primu ou suo a Zorba, incumandende·si a issu e pedende·li chi non si nche màndighet s´ou; de li dare cara finas a cantu naschet su fìgiu; de l´imparare a bolare, cando naschet...