L'opera

In sas istòrias chi cumponent custu libru, ambientadas in su Kibbutz Yekhat, de fantasia, in sos annos Chimbanta, Oz ambientat e descriet sa vida de unos cantos pessonàgios, sos isperos e sas timorias issoro. Lu faghet cun garbu, intrende in su tuvu de s´ànima issoro, finas cun umorismu e ironia: dae su primu, Zvi Provizor, giardineri de cabbale, ma cun sa mania de bòlere informare totu su kibbutz de cada mortu e de sas disauras naturales, a s´ùrtimu, Martin Vandenberg, torradu biu dae unu campu nazista, chi est morende de una maladia respiratòria, ma cheret galu insinnare a sos àteros s´esperanto, ´una limba noa, bona a imparare, chi punnat a aunire totu s´umanidade´.